2026-ലെ ടി20 ലോകകപ്പ് ഫൈനലിൽ ന്യൂസിലൻഡിനെ പരാജയപ്പെടുത്തി ഇന്ത്യ കിരീടം ചൂടിയതിന് പിന്നാലെ, സ്റ്റേഡിയത്തിൽ വെച്ച് ഇഷാൻ കിഷൻ നടത്തിയ ആഘോഷങ്ങളാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. ഗാലറിയിൽ തനിക്ക് പിന്തുണയുമായെത്തിയ കാമുകിയും മോഡലുമായ അദിതി ഹുണ്ടിയയെ മൈതാനത്തേക്ക് ക്ഷണിച്ച ഇഷാൻ, വിജയലഹരിയിൽ അദിതിയെ ആലിംഗനം ചെയ്യുകയും ചുംബിക്കുകയും ചെയ്തു. വർഷങ്ങളായി നീണ്ടുനിന്ന ഇരുവരുടെയും പ്രണയത്തെക്കുറിച്ചുള്ള ഗോസിപ്പുകൾക്ക് ഇതോടെ ഔദ്യോഗികമായ സ്ഥിരീകരണമായിരിക്കുകയാണ്.
അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന മത്സരത്തിലുടനീളം ചുവന്ന വസ്ത്രമണിഞ്ഞ് ഇഷാനെ പ്രോത്സാഹിപ്പിക്കുന്ന അദിതി ക്യാമറക്കണ്ണുകളുടെ ശ്രദ്ധ പിടിച്ചുപറ്റിയിരുന്നു. ഇന്ത്യൻ പതാക പുതച്ച് വിജയമാഘോഷിക്കുന്നതിനിടയിലാണ് ഇഷാൻ തന്റെ പ്രിയതമയെ ചേർത്തുപിടിച്ചത്. ഹാർദിക് പാണ്ഡ്യ ഉൾപ്പെടെയുള്ള സഹതാരങ്ങൾക്കൊപ്പമുള്ള ഇവരുടെ നൃത്തവീഡിയോകളും ആരാധകർ ഏറ്റെടുത്തു കഴിഞ്ഞു. ഇതിന് മുൻപ് ഇഷാന്റെ മുത്തച്ഛനും ഇരുവരും തമ്മിലുള്ള ബന്ധം ശരിവെച്ചിരുന്നു.
ജയ്പൂർ സ്വദേശിയായ അദിതി ഹുണ്ടിയ അറിയപ്പെടുന്ന ഒരു മോഡലും സംരംഭകയുമാണ്. 2017-ലെ ഫെമിന മിസ് ഇന്ത്യ ഫൈനലിസ്റ്റായിരുന്ന അദിതി, 2018-ൽ മിസ് ദിവ സുപ്രനാഷണൽ കിരീടവും നേടിയിട്ടുണ്ട്. 2019-ലെ ഐപിഎൽ കാലം മുതൽ ഇഷാൻ കിഷന്റെ മത്സരങ്ങളിൽ സ്ഥിരസാന്നിധ്യമായിരുന്ന അദിതിയെ 'മിസ്റ്ററി ഗേൾ' എന്നായിരുന്നു ആരാധകർ നേരത്തെ വിശേഷിപ്പിച്ചിരുന്നത്. ലോകകപ്പ് വേദിയിലെ ഈ പരസ്യമായ സ്നേഹപ്രകടനം ഇരുവരുടെയും വിവാഹവാർത്തകളിലേക്കും വഴിതുറക്കുമെന്ന പ്രതീക്ഷയിലാണ് ആരാധകർ.
